2016年8月28日 星期日

❤┌ 金魚 Elyse ◎ 遊記 ● 團友們澳門美食團 ◎ ┐│ 澳門 2015 │ ❤


話說我寫遊記真係好慢。。。哈哈!!
今次又慢左1年啦~
不過今次澳門遊記我一早製作好YouTube
唔知你睇左未呢?
未睇就Click入去睇啦,因為有D係Blog無的,
而有D係Blog有而片無的,所以希望大家兩邊都睇啦~


而點解會有澳門之行呢?
就是因為我的金魚男僕主廚生日既大日子!!


我們穿著我送給他的生日禮物情侶T-Shirt放閃出發
當日去到港澳碼頭買船飛就出發嚕~


第一站去左澳門旅遊塔食甜品!!
我好似每次去旅行第1餐都係食甜品,
上次台灣的鮮芋仙,韓國的土耳其雪糕XD


呢2款蛋糕,分別係馬卡龍朱古力及榛子朱古力!!
真係幾好味架,我都好想整返出黎!!

之後又係放閃光彈時間!!你喂我,我喂你XD


去到澳門旅遊塔,當然要去欣賞一下啦~
當時咁岩仲要有人跳笨豬跳!!
激起我的心,好滾動,好想跳呀!!
我人生中一定要跳一次!!!


滾動後,都係去食野醫肚啦~
澳門最出名當然係「豬扒包」!!
男僕推介:勝利茶餐廳


一直Order呢個動作都係全權交晒俾男僕!!
而望下隔離左右食D咩就係我的嗜好啦~


因為7月真係太熱啦,令到極少飲凍飲既我都忍不住,
飲返杯透心涼既凍華田!!


今餐重點係食「西多士」及「豬扒包」

其實那時係我第一次同男僕食「西多士」
見佢不停用叉子插件西多,真可憐。。。
不過男僕話咁樣牛油同糖漿先會滲入裡面,
味道更加正正正!!


「豬扒包」好簡單的一塊豬扒及包包而已
但拎係手時就已經覺得不簡單,包包好脆啊!!


豬扒亦好厚切,店舖仲好細心將豬扒包整齊地一分為二,
極方便顧客!!!

包包的內層只塗了一層薄薄既牛油,
而包包的表面就烘乾得非常脆,讚!!


呢個豬扒包與我之前介紹好好味既上水豬扒包好唔同
想睇上水豬扒包>> Here

勝利茶餐廳:豬扒係用炸的
而上水的:豬扒係用煎的
不過豬扒質地都係嫩的!!

而2間所用的包都不同,但同樣都好脆;
上水個間就會用埋洋蔥,比較Juicy,
勝利茶餐廳就比較香牛油味,2間我都覺得各有各好,
2款我都喜歡!!


之後行到新馬路大炮台街,都幾多野食的,
仲有來自台灣的「帝鈞碳烤胡椒餅」,
因為之前係台灣之旅食過其他品牌的胡椒餅(Here)
所以點都要買個一試!!


都是熱騰騰的,不過係饒河街夜市食個就真係比較好,
因為包皮比較脆,餡料都比較Juicy,
而且胡椒味更重,帶微辣!!


炎炎夏日,食完熱騰騰既胡椒餅,
當然要食返D凍野降溫啦~

來到「檸檬車露」
店內主要販售水果口味的義大利手工冰淇淋
店內有三十多種口味


我揀左青檸雞尾酒味
喜歡飲酒既我,會覺得唔夠酒味,
不過刪掉酒味這部分既話,其實又真係唔錯,
有種清新的微酸味,就算不太喜歡酸味既男僕都好喜歡!!


之後會合了男僕的澳門朋友,
他們帶左我去地澳門出名的葡國菜餐廳
「亞利咖喱屋」
**出名在晚餐時間要先預約,如果唔係會無位的**


一打開個餐牌,好色彩繽紛,與香港的餐牌好唔同,
每款菜色都有圖睇。真係令我眼花撩亂,
都係俾返熟悉的朋友Order啦~


 整體都好不錯,串燒唔係乾巴巴的,而且醬汁配合得很好;
而魷魚筒好好味,爽口新鮮;
不過飯那款就炒得唔夠乾身。


因為我們那時只有一天假期,
所以今天我們都真係食到盡的,
但我們一點都沒有浪費,碟碟清的!!


而今次澳門之行的晚餐,男僕推介「祥記麵家」
佢話好好味的,不過我地太飽啦,已經食唔落。

所以轉戰輕食的「百勝菜館」
 食滋補的鮮奶燉花膠缽仔焗蛋!!

其實當天都有食翅,不過現在已經唔食嚕,
所以唔理好唔好味,都唔會分享,不想鼓吹!!


魚腸缽仔焗蛋

本身男僕係想食唔知咩虫焗蛋,嚇到我死!!
好彩店舖話賣晒~即刻鬆晒!!

而叫左魚腸就接受得到啦~
而且焗蛋好滑,而魚腸就好爽脆,
而且焗的方式令焗蛋中有湯汁,真係很不錯!!


金魚推介:鮮奶燉花膠

女生嘛~鮮奶燉花膠真係好吸引我的!!
所以愛疼我既男僕,係我未開聲前而叫左1碗給我,
佢係呢方面真係好細心,抵讚!!


鮮奶燉花膠中更加入紅棗,真係幾補!!
而花膠既分量真係好多!!
而味道我係喜歡,不過可能店舖係用全脂奶吧,
所以係幾甜的!!


今日最後一個節目就係男僕極力推薦:
「水舞間」

在我未睇過前,我會覺得無咩特別,
都是特技人飛來飛去而已!!點解門票要咁貴?
但男僕就同我講「一生一定要睇1次!!」
佢係超推薦!佢係超推薦!佢係超推薦!


睇過後,我都會同大家講「一生一定要睇1次!!」
而且這個價錢係抵俾,係值得這個價錢!!
我整場都張開口,因為係咁「嘩~嘩~嘩~」
但舞台好多位置都在表演,特技人又好多,
真係會睇唔晒,完左之後我倆討論一下,
先發覺男僕比我睇得更多,因為他已經係第2次睇,
發掘更多演出,去睇「水舞間」真係要一眼關七!!

好開心有「水舞間」替這個旅程作一個圓滿的結尾!!
挺住滿足的肚皮、帶著2手手信、懷著感恩的心情,
回家去~~


*全自費*

文章屬個人分享及感受,大家皮膚不同性質,
適合與否都要自己親身試過才知道的。 
希望大家喜歡今次的分享~給我一個支持,
請Like my facebook page吧~ 金魚自由遊 Elyse Fish
https://www.facebook.com/elyse214

沒有留言:

張貼留言